Categories
I. TIMỌTI

I. TIMỌTI 2

1 Ya mere ihe mbu m’nādusi ọdu ike bu, ka anāriọ aririọ, kpe kwa ekpere, riọ kwa aririọ anāriọrọ ndi ọzọ, kele kwa ekele, n’ihi madu nile;

2 n’ihi ndi-eze na ndi nile nọ n’ọnọdu di elu; ka ayi we biri obi udo na nke di nwayọ nime nsọpuru-Chineke nile na ikwesi-nsọpuru nile.

3 Nka di nma buru kwa ihe agānara nke-ọma n’iru Onye-nzọputa-ayi, bú Chineke;

4 Onye nāchọ ka azọputa madu nile, ka ha biaru kwa nmazu nke ezi-okwu.

5 N’ihi na otù Chineke di, otù Onye-ob͕ub͕o di kwa n’ab͕ata Chineke na madu, Onye Ya onwe-ya bu madu, bú Kraist Jisus,

6 Onye nyere Onwe-ya ka Ọ buru ihe-nb͕aputa n’ihi madu nile; nke agāb͕a àmà-ya n’oge nke aka ya;

7 nke edebere mu onwem ka m’buru onye-nkwusa na onye-ozi ka m’we b͕a àmà ahu (anamekwu ezi-okwu, ekwughm okwu-ugha), ibu kwa onye-ozizí nke ndi mba ọzọ nime okwukwe na ezi-okwu.

8 Ya mere ezuberem ka ndikom nēkpe ekpere n’ebe nile ọ bula, nāchili aka di ọcha elu, nēweghi iwe, nārughi kwa uka.

9 Otú ahu, ezuberem ka ndinyom were ihe-ichọ-nma kwesiri ekwesi chọ onwe-ha nma, ya na nsọpuru na uche zuru okè; ọ bughi isi akpara akpa, na ọla-edo ma-ọbu pearl ma-ọbu uwe di oké ọnu-ahia;

10 kama (nke kwesiri ndinyom nēkwuputa egwu Chineke) ka ha site n’ezi ọlu chọ onwe-ha nma.

11 Ka nwanyi were nwayọ muta n’ido onwe-ya n’okpuru n’uzọ nile.

12 Ma ekweghm nwanyi ka o zí ihe, ma-ọbu ka ọ buru onye-isi n’ebe nwoke nọ, kama ka ọ nọ n’ọnọdu nwayọ.

13 N’ihi na Adam ka eburu uzọ kpu, mb͕e ahu ewe kpu Iv;

14 ọ bughi kwa Adam ka aghọrọ aghughọ, ma ebe aghọb͕uru nwanyi ọ bu nwanyi ahu ka ahuworo na ọ nọ nime njehie:

15 ma agēsite n’ọmumu-nwa-ya zọputa ya, ma ọ buru na ha anọgide nime okwukwe na ihu-n’anya na odido-nsọ, ya na uche zuru okè.

Categories
I. TIMỌTI

I. TIMỌTI 3

1 Okwu a kwesiri ntukwasi-obi, Ọ buru na onye ọ bula nāb͕aso ọnọdu onye nēlekọta nzukọ Kraist anya, agu ọlu ọma nāgu ya.

2 Ya mere onye nēlekọta nzukọ Kraist anya aghaghi ibu onye anādighi-akalu, di nke otù nwunye, onye-anya-udo, onye uche-ya zuru okè, onye omume-ya kwesiri ekwesi, onye nēle ndi-ọbìa anya nke-ọma, onye nwere ike izí ihe;

3 onye nādighi-ese okwu site n’iṅubiga manya ókè, onye nādighi-eti madu aka; kama onye nwere obi-ọma, onye nādighi-alu ọ̀gù, onye nādighi-ahu ego n’anya;

4 onye nāchi èzí-na-ulo nke aka ya nke-ọma, nēnwe kwa umu-ya n’okpuru ya n’ikwesi-nsọpuru nile;

5 (ma ọ buru na onye ọ bula amataghi otú ọ gāchi èzí-na-ulo nke aka ya, ò gēsi aṅa le nzukọ Chineke anya nke-ọma?)

6 onye nābughi onye ọhu, ka aghara ifuli ya elu, o we dabà n’ọmuma-ikpé ekwensu.

7 Ma ọ ghaghi kwa inwe àmà di nma site n’ọnu ndi nọ n’èzí; ka ọ ghara idabà n’ita-uta, ya na ima n’ọnyà ekwensu.

8 Otú ahu ndi nējere nzukọ Kraist ozi aghaghi ibu ndi kwesiri nsọpuru, ndi nēnweghi ire abua, ndi nādighi-aṅubiga manya ókè, ndi akpiri urù nke nēweta ihere nādighi-akpọ ha nku;

9 ndi nēnwe ihe-omimi nke okwukwe-ayi nime akọ-na-uche di ọcha.

10 Ma ka eburu uzọ nwa kwa ndia; mb͕e ahu ka ha jebe ozi, ma ọ buru na ha bu ndi anāpughi ibo ebubo.

11 Otú ahu ndinyom aghaghi ibu ndi kwesiri nsọpuru, ndi nādighi-ebo madu ebubo ugha, ndi nwere anya-udo, ndi kwesiri ntukwasi-obi n’ihe nile.

12 Ka ndi nējere nzukọ Kraist ozi buru di nke otù nwanyi, nāchi umu-ha na èzí-na-ulo nke aka ha nke-ọma.

13 N’ihi na ndi jeworo ozi nke-ọma nēnwetara onwe-ha ọnọdu ọma, na oké nkwuwa-okwu nime okwukwe nke ekwere na Kraist Jisus.

14 Ihe ndia ka m’nēdegara gi n’akwukwọ, ọ bu ezie na anamele anya ibiakute gi na mb͕e ntà;

15 ma ọ buru na m’nānọ ọdù, ka i we mata otú anāghaghi ibi obi n’èzí-na-ulo Chineke, ebe ọ bu nzukọ nke Chineke di ndu, bú ide na ntọ-ala nke ezi-okwu.

16 Ọ bu kwa ihe anēkwuputa na ọ di uku, bú ihe-omimi nke nsọpuru-Chineke; Onye ahu Nke emere ka Ọ puta ìhè n’anu-aru, Nke aguru Ya n’onye ezi omume nime mọ, Nke emere ka ndi-mọ-ozi hu Ya anya, Nke ekwusara Ya n’etiti ndi mba ọzọ, Nke ekwere na Ya nime uwa, Nke anara Ya n’elu nime ebube.

Categories
I. TIMỌTI

I. TIMỌTI 4

1 Ma Mọ Nsọ nēkwuwa okwu, si, na n’oge ikpe-azu ufọdu gēwezuga onwe-ha n’ebe okwukwe-ayi di, nāṅa nti ndi-mọ nēduhie eduhie na ozizí nke ndi-mọ ọjọ,

2 site n’iru-abua nke ndi nēkwu okwu-ugha, ndi eji ígwè ọku da ha n’akọ-na-uche nke aka ha;

3 ndi nēb͕ochi madu ilu di na nwunye, ndi si kwa madu erila ihe-oriri di iche iche, nke Chineke kère ka ndi kwere ekwe, ndi mazu-kwa-ra ezi-okwu, ka ndi ahu were ekele nara.

4 N’ihi na ihe nile ọ bula Chineke kère di nna, ọ dighi kwa ihe ọ bula agāju, ma ọ buru na ewere ekele nara ya:

5 n’ihi na esitere n’okwu Chineke na ekpere do ya nsọ.

6 Ọ buru na i me ka umu-nna-ayi nēchè uche n’ihe ndia, i gābu onye nējere Kraist Jisus ozi nke-ọma, ebe anāzùputa gi n’okwu nile nke okwukwe-ayi, na nke ozizí ọma ahu nke i soworo n’ukwu n’ukwu:

7 ma ju akukọ-irò nile emeruru emeru nke di-kwa-ra agadi-ndinyom. Ma nānwa onwe-gi ka i we rue nsọpuru-Chineke:

8 n’ihi na ọnwunwa nke aru bara urù nye ihe ntà; ma nsọpuru-Chineke bara urù nye ihe nile, ebe o nwere nkwa nke ndu, ma nke ndu ub͕u a, ma nke gaje ibia.

9 Okwu a kwesiri ntukwasi-obi, kwesi kwa ka anara ya nke-ọma n’uzọ nile ọ bula.

10 N’ihi na ọ bu iru nka ka ayi nādọb͕u onwe-ayi n’ọlu, nāb͕asi kwa nb͕a ike, n’ihi na ayi elewo anya Chineke di ndu, Onye bu Onye-nzọputa madu nile, ma nke kachasinu Onye nzọputa nke ndi kwere ekwe.

11 Nēnye ihe ndia n’iwu, nēzí kwa ha.

12 Ekwela ka onye ọ bula lelìa nwata i bu anya; kama me onwe-gi ka i buru ndi kwere ekwe ihe-atù, n’okwu, n’ibi-obi, n’ihu-n’anya, n’okwukwe, n’idi-ọcha.

13 Rue mb͕e m’gābia, nāṅa nti ọgugu-akwukwọ-gi na idu-ọdu-gi na ozizí-gi.

14 Elefula onyinye-amara ahu nke di nime gi anya, nke esitere n’ibu-amuma, ya na ibikwasi-aka-n’isi nke ndi bu okenye, nye gi.

15 Nējisi ike n’ihe ndia; nānọsi ike nime ha; ka iga-n’iru-gi we puta ìhè n’ebe madu nile nọ.

16 Riba onwe-gi na ozizí-gi ama. Nānọgide n’ihe ndia; n’ihi na n’ime nka i gāzọputa onwe-gi zọputa kwa ndi nānu olu-gi.

Categories
I. TIMỌTI

I. TIMỌTI 5

1 Abarala okenye oké nba, kama nāriọ ya aririọ dika nna; nēmeso kwa umu-okorọbia dika umu-nne:

2 ndinyom, ndi bu okenye, dika ndi bu nne; umu-ab͕ọghọ dika umu-nne-nwanyi, n’idi-ọcha nile.

3 Nāsọpuru ndinyom di-ha nwuru, bú ndi nọ ezie n’ọnọdu ndinyom di-ha nwuru.

4 Ma ọ buru na nwanyi ọ bula di-ya nwuru nwere umu ma-ọbu umu umu, ka ha buru uzọ muta isọpuru Chineke n’aru ndi èzí-na-ulo nke aka ha, na inyeghachi ndi muru ha ihe: n’ihi na nka bu ihe anānara nke-ọma n’iru Chineke.

5 Ma nwanyi nke bu onye di-ya nwuru n’ezie, nke arapu-kwa-ra nání ya, ọ tukwasiwo obi-ya na Chineke, nānọgide kwa n’aririọ-ya na ekpere-ya abali na ehihie.

6 Ma nwanyi nke nādi ndu ọjọ dika ọ nātọ aru-ya utọ, ọ nwuruwo mb͕e ọ nọ na ndu.

7 Nēnye kwa ihe ndia n’iwu, ka ha we buru ndi anādighi-akalu.

8 Ma ọ buru na onye ọ bula ebughi uzọ chère ndi nke aka ya ihe nākpa ha, ma nke kachasi ndi èzí-na-ulo nke aka ya, ọ gọnariwo okwukwe-ayi, jọkari kwa onye nēkweghi ekwe na njọ.

9 Ka aghara ide aha nwanyi ọ bula n’akwukwọ dika nwanyi di-ya nwuru nke akāb͕aghi ọgu arọ atọ, onye buworo nwunye nke otù di,

10 onye anāb͕ara ya ezi àmà n’ọlu ọma; ọ buru na ọ zùputawo umu, ọ buru na o lewo ndi-ọbìa anya nke-ọma, ọ buru na ọ sawo ukwu ndi nsọ, ọ buru na o b͕owo nkpà ndi anākpab͕u, ọ buru na o sosiwo ezi ọlu nile ọ bula ike.

11 Ma ju umu-ab͕ọghọ di-ha nwuru: n’ihi na mb͕e ọ bula ha nupuru isi n’okpuru Kraist-ayi, ha nāchọ ilu di;

12 ewe ma ha ikpé, n’ihi na ha juru okwukwe mbu ha.

13 Ma tukwasi ihe ndia ha nāmuta kwa ibu ndi nādighi-alu ọlu, nēje n’ulo di iche iche; ma ọ bughi nání na ha bu ndi nādighi-alu ọlu, kama ha bu kwa ndi nēkwu okwu nzuzu, buru kwa ndi nētiye aka n’ọlu nābughi nke aka ha, nēkwu okwu nēkwesighi ka ha kwu.

14 Ya mere anamezube ka umu-ab͕ọghọ ndi di-ha nwuru luru di, mu kwa umu, nāchi kwa èzí-na-ulo-ha, ghara kwa inye onye nēmegide ayi ihe o gēji kwutọ:

15 n’ihi na ufọdu ejehiewo uzọ so Setan ub͕u a.

16 Ọ buru na nwanyi ọ bula nke kwere ekwe nwere ndinyom di-ha nwuru, ya b͕o ha nkpà, ka aghara kwa ibob͕u nzukọ Kraist; ka o we b͕o ndi ahu nkpà, bú ndi nọ n’ezie n’ọnọdu ndinyom di-ha nwuru.

17 Ka agua ndi-okenye na ndi kwesiri nsọpuru okpukpu abua, bú ndi nāchi isi nke-ọma, ma nke kachasinu ndi nādọb͕u onwe-ha n’ọlu nime okwu Chineke na ozizí.

18 N’ihi na ihe edeworo n’akwukwọ nsọ nāsi, Ekechila ọnu ehi mb͕e ọ nāzọcha ọka. Na, Onye-ọlu kwesiri ugwọ-ọlu-ya.

19 Anarala ebubo anēbo okenye, ma-ọbughi n’ọnu ndi-àmà abua ma-ọbu atọ.

20 Nātu ndi nēmehie nmehie-ha n’anya n’iru madu nile, ka ndi fọduru we tu kwa egwu.

21 Anamagwasi gi ike n’iru Chineke, na n’iru Kraist Jisus, na n’iru ndi-mọ-ozi arọputara, ka i debe iwu ndia, ghara ima ikpé mb͕e i kānughi, ghara kwa ime ihe ọ bula n’uzọ isọ-anya.

22 Ebikwasila onye ọ bula aka n’isi ọsọsọ, eso-kwa-la ndi ọzọ nwekọ nmehie-ha: debe onwe-gi ọcha.

23 Abu-kwa-la onye nāṅu nání miri ọzọ, kama nāṅu nwantinti manya-vine n’ihi afọ-gi na nriaria nke nāria gi ọtutu mb͕e.

24 Nmehie madu ufọdu nāputa ìhè, n’ihi na ha buru ha uzọ nāga ikpé; ma nmehie madu ufọdu nēso kwa ha n’azu.

25 Otú ahu, ọlu nile nke di nma nāputa kwa ìhè; apughi kwa izobe ọlu nke di iche.

Categories
I. TIMỌTI

I. TIMỌTI 6

1 Ka ha ra, bú ndi-orù nke nọ n’okpuru yoke, ha gua ndi-nwe-ha na ndi kwesiri nsọpuru nile, ka ewe ghara ikwulu aha Chineke na ozizí-ayi.

2 Ma ndi nwere ndi kwere ekwe dika ndi-nwe-ha, ka ha ghara ilelì ha anya, n’ihi na ha bu umu-nna-ha; kama ka ha buru orù-ha kari, n’ihi na ndi soro ha ke òkè n’ọlu ọma ha bu ndi kwere ekwe na ndi ahuru n’anya. Nēzí ihe ndia nādu kwa madu ọdú bayere ha.

3 Ọ buru na onye ọ bula nēzí ihe di iche, nēkweyeghi kwa n’okwu nēnye ezi ndu, bú okwu nke Onye-nwe-ayi Jisus Kraist, na ozizí ahu nke di ka nsọpuru-Chineke si di;

4 afuliwo ya elu, ọ dighi ihe ọ mara, kama ọria bayere ajuju na esem-okwu n’ihi okwu efu nāria ya, nke ekworo, esem-okwu, nkwulu, ajọ èchìchè, nēsi nime ha nāputa,

5 bú iru-uka nke madu ndi mebiworo n’uche, ndi apunarawo-kwa-ra ha ezi-okwu, ebe ha nāgu na nsọpuru-Chineke bu uzọ irita urù.

6 Ma nsọpuru-Chineke, ya na inwezu ihe nile di nkpà, bu uzọ irita urù nke-uku;

7 n’ihi na ayi ewetaghi ihe ọ bula n’uwa, ọ bu kwa n’ihi na ayi apughi iwere ihe ọ bula pua nime ya;

8 ma ebe ayi nwere ihe-oriri na ihe ib͕okwasi n’aru, afọ gēju ayi n’ihe ndia.

9 Ma ndi nēzube ibu ọgaranya nādabà n’ọnwunwa na ọnyà na ọtutu agu ihe ọjọ nke uche nādighi nime ha, nke nēmeru kwa aru, bú ihe nēme ka madu mikpù emikpù nime nbibi na ila-n’iyì.

10 N’ihi na ihu ego n’anya bu nkpọrọgwu nke ihe ọjọ nile di iche iche: nke ufọdu nāb͕asosi ike, ewe duhie ha n’okwukwe-ayi, ha were kwa ọtutu ihe-nb͕u dupue onwe-ha.

11 Ma gi onwe-gi, onye nke Chineke, nāb͕anari ihe ndia; ma nāb͕aso ezi omume, nsọpuru-Chineke, okwukwe, ihu-n’anya, ntachi-obi, idi-nwayọ.

12 Nāb͕asi nb͕a ọma nke okwukwe ike, jide ndu ebighi-ebi aka nke akpọrọ gi ka i nata ya, i kwuputa-kwa-ra nkwuputa ọma ahu n’iru ọtutu ndi-àmà.

13 Anamenye gi iwu n’iru Chineke, Onye nēme ka ihe nile di ndu, ya na n’iru Kraist Jisus, Onye b͕ara àmà nkwuputa ọma ahu n’iru Pọntiọs Pailat;

14 ka gi onwe-gi debe ihe ahu enyere n’iwu, nēnweghi ntupọ, onye anādighi-akalu akalu, rue ngosi nke Onye-nwe-ayi Jisus Kraist:

15 nke Ọ gēgosi n’oge nke aka Ya, Onye nání Ya bu Onye di ike, Onye bu kwa onye di ngọzi, bú Eze kachasi ndi bu eze, Onye bu kwa Onye-nwenu kachasi ndi nāchi ka ndi-nwe madu;

16 Onye nání Ya nwere anwughi-anwu, nēbi nime ìhè nke anāpughi ibiaru nso; Onye ọ dighi madu ọ bula huworo Ya anya, ma-ọbu pu ihu Ya anya: Onye nsọpuru na ike ebighi-ebi diri. Amen.

17 Nēnye ndi bu ọgaranya n’oge di ub͕u a iwu, ka ha ghara itukwasi uche-ha n’ihe di elu, ghara kwa itukwasi obi n’ihe ahu anējighi aka, bú àkù, kama ka ha tukwasi obi na Chineke, Onye nēwere àkù-Ya nye ayi ihe nile ka ha buru ihe gātọ ayi utọ;

18 ka ha nēme ezi ihe, ka ha buru ọgaranya n’ọlu ọma nile, ka ha buru ndi kwadebeworo ime ka ndi ọzọ keta ihe ha nwere, ka ha buru ndi kwere ka ndi ọzọ so ha nwekọ ihe;

19 ka ha kpadoro onwe-ha ntọ-ala ọma nye oge gaje ibia, ka ha we jide ndu ahu nke bu ndu n’ezie.

20 Biko Timọti, nēche ihe ahu enyere gi n’aka idebe, nēze okwu efu nile nke emeruru emeru nke ihe ahu anākpọ ihe-ọmuma n’uzọ ugha, ha na nguzogide-ya nile;

21 bú ihe-ọmuma nke ufọdu kwuputara we hie n’ihe bayere okwukwe-ayi.

Ka amara diyere unu.

Categories
II. TIMỌTI

II. TIMỌTI 1

1 Pọl, onye-ozi nke Kraist Jisus site n’ọchichọ nke Chineke, dika nkwa nke ndu ahu nke di nime Kraist Jisus si di,

2 nēdegara Timọti akwukwọ, bú nwam nke m’huru n’anya: Amara na ebere na udo diri gi, nke si n’aka Chineke, bú Nna-ayi, na Kraist Jisus Onye-nwe-ayi puta.

3 Anameleke Chineke, Onye m’nēkpere site na nnam ochie-hà n’akọ-na-uche di ọcha, otú nchetam bayere gi n’aririọm nile di n’ewepughi aka,

4 n’ihi na agu ihu gi nāgusim ike abali na ehihie, ebe m’nēcheta anya-miri-gi nile, ka m’we juputa n’ọṅù;

5 ebe emerem ka m’cheta okwukwe iru-abua nādighi ya nke di nime gi; bú okwukwe nke buru uzọ biri nime nne-gi ochie Lois na nne-gi Yunaisi; ma emerem ka m’kweye na o bi kwa nime gi.

6 Ọ bu kwa n’ihi ihe a ka m’nēchetara gi ka i me ka onyinye-amara nke Chineke nwuru ọku, bú nke di nime gi site n’ibikwasi aka abua nkem n’isi-gi.

7 N’ihi na Chineke enyeghi ayi mọ nke ujọ; kama ọ bu nke ike na ihunanya na ime ka uche zuo okè.

8 Ya mere ka ihere àmà nke Onye-nwe-ayi, ma-ọbu ihere nke mu onye-nkpọrọ-Ya, ghara ime gi: kama so ozi ọma Ya hujukọ anya dika ike nke Chineke si di;

9 Onye zọputara ayi, were kwa ọkpukpọ di nsọ kpọ ayi, ọ bughi dika ọlu-ayi si di, kama dika ihe Ya onwe-ya zubere, na amara-Ya, si di, nke enyere ayi nime Kraist Jisus mb͕e oge ebighi-ebi akērughi,

10 ma emere ka ọ puta ìhè ub͕u a site na ngosi nke Onye-nzọputa-ayi Kraist Jisus, Onye mere ka ọnwu ghara idi ìrè, site kwa n’ozi ọma Ya weputa ndu na emebighi-emebi n’ìhè,

11 bú ozi ọma nke edoro mu onwem ka m’buru onye-nkwusa, na onye-ozi, na onye-ozizí, izisa ya.

12 Ọ bu kwa n’ihi ihe a ka m’nāhu kwa ahuhu ndia: ma ihere adighi-emem; n’ihi na amataram Onye m’kweworo okwu-Ya, eme-kwa-ra ka m’kweye na Ọ puru iche ihe m’nyere n’aka-Ya idebe nche rue ubọchi ahu.

13 Jide ihe ilere anya nke okwu nēnye ezi ndu nke i nuru n’ọnum, nime okwukwe na ihunanya nke di nime Kraist Jisus.

14 Ihe ọma ahu nke enyere n’aka-gi idebe, were Mọ Nsọ Nke bi nime ayi nēche ya.

15 I matara nka, na ndi nile di n’Esia b͕akutaram azu; ndi Faigelọs na Hamọgenis di n’etiti ha.

16 Ka Onye-nwe-ayi mere èzí-na-ulo Ọnisifọrọs ebere: n’ihi na o mere ka m’nwe ume ndu ọtutu mb͕e, ihere nkpọrọm emeghi kwa ya;

17 kama, mb͕e ọ biaruru Rom, o were inu-ọku-n’obi chọbam, we chọtam

18 (ka Onye-nwe-ayi nye ya ka ọ chọta ebere n’aka Onye-nwe-ayi n’ubọchi ahu); ka ha ra kwa, bú ihe o ji jere m ozi n’Efesọs, gi onwe-gi jere karia.

Categories
II. TIMỌTI

II. TIMỌTI 2

1 Ya mere, gi onwe-gi, nwam, ka eme ka i di ike n’amara nke di nime Kraist Jisus.

2 Ihe nile i nukwara n’ọnum site n’etiti ọtutu ndi-àmà, nye ihe ndia n’aka madu ndi kwesiri ntukwasi-obi idebe, bú madu ndi ọ gēkwe kwa izí madu-ibe-ha ihe ndia.

3 Som hujukọ anya, dika onye-agha ọma nke Kraist Jisus.

4 Ọ dighi onye-agha ọ bula nātuhi onwe-ya n’ihe nke ibi-obi a mb͕e o nēbu agha; ka o we me ihe gātọ onye dere aha-ya n’akwukwọ dika onye-agha.

5 Ma ọ buru kwa na onye ọ bula nāb͕a nb͕a, ekpughi ya okpu-nmeri, ma ọ buru na ọ b͕aghi nb͕a otú ọ di n’iwu.

6 Onye-ọlu-ubi nke nādọb͕u onwe-ya n’ọlu aghaghi ibu uzọ kère òkè na nkpuru-ya.

7 Nātughari uche n’ihe m’nēkwu; n’ihi na Onye-nwe-ayi gēnye gi nghọta n’ihe nile.

8 Nēcheta Jisus Kraist, dika Onye emeworo ka O si na ndi nwuru anwu bilie, Onye si na nkpuru Devid puta, dika ozi ọmam si di:

9 nke m’nāhuju anya nime ya rue ab͕u, dika onye nālu ọlu ọjọ; ma ekeghi okwu Chineke ab͕u.

10 N’ihi nka ka m’nwere ntachi-obi n’ihe nile n’ihi ndi arọputara, ka ha onwe-ha we ru kwa nzọputa nke di nime Kraist Jisus, ya na ebube ebighi-ebi.

11 Okwu a kwesiri ntukwasi-obi: N’ihi na asi na ayi soro Ya nwukọ ọnwu, ayi gēso kwa Ya dikọ ndu:

12 asi na ayi nēnwe ntachi-obi, ayi gēso kwa Ya bukọ eze: asi na ayi gāgọnari Ya, Ya onwe-ya gāgọnari kwa ayi:

13 asi na ayi ekweghi ekwe, Ya onwe-ya nānọgide n’ikwesi ntukwasi-obi; n’ihi na Ọ pughi igọnari Onwe-ya.

14 Nēchetara ha ihe ndia, nāgwasi ha ike n’iru Onye-nwe-ayi, ka ha ghara ise okwu bayere okwu efu, bú ihe nābaghi n’ihe, nēkpù ndi nānu anu iru.

15 Nānu ọku n’obi iche onwe-gi n’iru madu dika onye Chineke nwaputaworo, onye-ọlu nke ihere nāpughi ime ya, onye nēkwuzi okwu nke ezi-okwu ahu.

16 Ma nēze okwu efu nile emeruru emeru: n’ihi na ha gāga kari n’iru n’asọpurughi-Chineke,

17 okwu-ha gābu kwa ọnyá nāba aba dika gangrene: ndi Haimeniọs na Filitọs di n’etiti ha;

18 bú madu ndi hiere n’ihe bayere ezi-okwu ahu, nāsi na nbilite-n’ọnwu agabigawo ub͕u a, ha nēkpù kwa okwukwe madu ufọdu iru.

19 Otú ọ di, ntọ-ala di ike nke Chineke nēguzo, ebe o nwere akàrà nka, Onye-nwe-ayi mara ndi bu nke Ya: na, Ka onye ọ bula nke nākpọ aha Onye-nwe-ayi si n’ajọ omume wezuga onwe-ya.

20 Ma nime ulo uku ọ bughi nání ihe ọla-edo na ihe ọla-ọcha di, kama ihe osisi na ihe ájá di kwa; e mekwara ufọdu ka ha buru ihe-nsọpuru, me kwa ufọdu ha na buru ihe-ihere.

21 Ya mere ọ buru na onye ọ bula asacha onwe-ya pua n’ihe ndia, ọ gābu ihe emere ka ọ buru ihe-nsọpuru, ihe edoworo nsọ, ihe bara n’ihe ka Onye-nwe-ya were ya me ihe, ihe edoziworo iji lu ezi ọlu nile ọ bula.

22 Ma nāb͕anari agu ihe ọjọ nāgu nwa-okorọbia, nāb͕aso kwa ezi omume, okwukwe, ihu-n’anya, udo, gi na ndi nākpọku Onye-nwe-ayi site n’obi di ọcha.

23 Ma nāju iju-ajuju nzuzu na nke amaghi-ihe, ebe i matara na ha nāmuputa ilu-ọ̀gù.

24 Ma orù nke Onye-nwe-ayi aghaghi ibu onye nādighi-alu ọ̀gù, kama ọ ghaghi idi nwayọ n’ebe madu nile nọ, ọ ghaghi kwa ibu onye nwere ike izí ihe, onye nānagide ihe ọjọ,

25 n’idi-nwayọ nādọ ndi nēdo onwe-ha imegide ya aka na nti; ma asi na ọ bu ezie ma eleghi anya na Chineke gēnye ha nchèghari ka ha we mazu ezi-okwu,

26 we teta n’ura manya pua n’ọnyà ekwensu, ebe orù Onye-nwe-ayi nwudeworo ha na ndu ka ha me ihe Chineke nāchọ.

Categories
II. TIMỌTI

II. TIMỌTI 3

1 Ma mara nka, na oge di oké egwu gābia na mb͕e ikpe-azu.

2 N’ihi na madu gābu ndi nāhu nání onwe-ha n’anya, ndi nāhu ego n’anya, ndi nānya isi, ndi-npako, ndi-nkwulu, ndi nēkweyeghi ndi muru ha, ndi nēnweghi ekele, ndi nādighi ọcha n’obi,

3 ndi ihe madu-ibe-ha nādighi-atọ utọ, ndi nādighi-ab͕a ndu, ndi nēbo ebubo ugha, ndi nādighi-ejide onwe-ha, ndi di ka anu-ọhia, ndi nādighi-ahu ezi ihe n’anya,

4 ndi nārara madu nye n’aka ndi-iro-ha, ndi-isi-ike, ndi afuliworo elu, ndi nāhu ihe-utọ n’anya kama ihu Chineke n’anya;

5 ndi nēnwe udi nke nsọpuru-Chineke, ma ha agọwo ike-ya: gi b͕akuta kwa ndia azu.

6 N’ihi na ha sitere na ndia, bú ndi nēb͕ebà nime ulo di iche iche, nādọta kwa ndinyom nēnweghi uche n’agha, bú ndi ekpokwasiworo ha nmehie, ndi agu ihe ọjọ di iche iche dufuworo,

7 ndi nāmu ihe mb͕e nile, ma ha apughi ibiaru imazu ezi-okwu mb͕e ọ bula.

8 Ma otù uzọ ahu Janis na Jambris guzogidere Moses, otú a ka ndia nēguzogide kwa ezi-okwu ahu; bú madu ndi mebiworo n’uche, ndi ajuru aju n’ihe bayere okwukwe-ayi.

9 Ma ha agaghi-aga n’iru kari: n’ihi na enweghi-uche-ha gāputasi ìhè nye madu nile, dika enweghi-uche nke ndi ahu putakwara.

10 Ma gi onwe-gi soro ozizím, omumem, ihe m’zubere, okwukwem, ogologo-ntachi-obim, ihu-n’anyam, ntachi-obim,

11 nsob͕um nile, ahuhum nile; aha ihe dakwasirim n’Antiọk, n’Aikọniọm, na Listra; aha nsob͕u m’nagidere: Onye-nwe-ayi dọputa-kwa-ram nime ha nile.

12 E, agēsob͕u kwa ndi nile ndi nāchọ idi ndu n’uzọ isọpuru Chineke nime Kraist Jisus.

13 Ma ajọ madu nile na ndi-aghughọ gānaga n’iru n’ijọkari njọ, nēduhie ndi ọzọ, anēduhie kwa ha.

14 Ma gi onwe-gi, nọgide nime ihe nile i mutara, nke eme-kwa-ra ka i kwere ha, ebe i matara madu ndi i mutara ha n’ọnu-ha;

15 ebe i ma-kwa-ra na i sitere n’oge i di na nwa ọhu mata ihe di nsọ nile edeworo n’akwukwọ nsọ nke puru ime ka i buru onye-amam-ihe inata nzọputa site n’okwukwe nke i kwere na Kraist Jisus.

16 Ihe ọ bula edeworo n’akwukwọ nsọ bu ihe si n’obi Chineke puta, ọ ba-kwa-ra urù iji zí ihe, na iji tu madu nmehie-ha n’anya, na iji me ka uche madu guzozie, na iji zùputa nzùputa nke di n’ezi omume:

17 ka onye nke Chineke we zue okè, onye emeworo ka o zue okè ilu ezi ọlu nile ọ bula.

Categories
II. TIMỌTI

II. TIMỌTI 4

1 Anamagwasi gi ike n’iru Chineke na Kraist Jisus, Onye gaje ikpe ndi di ndu na ndi nwuru anwu ikpé, ewerekwam ngosi-Ya na ala-eze-Ya si gi;

2 kwusa okwu-Ya; tukwasi uche n’ọlu-gi n’oge kwesiri, ma-ọbu n’oge nēkwesighi; tu madu nmehie-ha n’anya, ba nba, riọ aririọ, n’ogologo-ntachi-obi nile na ozizí nile.

3 N’ihi na oge gādi mb͕e ha agaghi-anagide ozizí ahu nke nēnye ezi ndu; kama, ebe ha nwere nti nākọ ọkọ, ha gēkpokwasi ndi-ozizí nye onwe-ha dika agu ihe ọjọ nke aka ha si di;

4 ha gēchighari kwa nti-ha ka ha ghara inu ezi-okwu, ma ha gējehie ṅa nti akukọ-irò.

5 Ma gi onwe-gi, nēnwe anya-udo n’ihe nile, huju anya, lua ọlu nke onye nēzisa ozi ọma, jezu ozi-gi.

6 N’ihi na anāwusim ub͕u a dika àjà-ihe-ọṅuṅu, oge ulam eruwo kwa.

7 Ab͕asiwom nb͕a ọma ahu, ab͕asiwom ọsọ ahu, edebesiwom okwukwe ahu:

8 nke fọduru bu na edebeworom okpu-eze nke ezi omume ahu, nke Onye-nwe-ayi, bú Onye ezi omume n’ikpe ikpé, gēnyeghachim n’ubọchi ahu: ma ọ bughi nání mu onwem, kama Ọ gēnyeghachi kwa ndi nile huworo ngosi-Ya n’anya.

9 Were inu-ọku-n’obi biakutem ọsọsọ:

10 n’ihi na Dimas rapuru náním, ebe ọ huru oge di ub͕u a n’anya, o we ga Tesalọnaika; Kresens gara Galetia, Taitọs gara Dalmetia.

11 Nání Luk nọyerem. Kuru Mak, duru ya ka o so gi onwe-gi bia: n’ihi na ọ bu onye baram n’ihe ijerem ozi.

12 Ma ezigaram Tikikọs n’Efesọs.

13 Uwe nāchu oyi nke m’rapuru na Troas n’aka Kapọs, weta ya mb͕e i gābia, ya na akwukwọ nile, ma nke kachasinu, weta akwukwọ parchment nile.

14 Aleksanda onye nākpu ọlà merem ọtutu ihe ọjọ: Onye-nwe-ayi gēnyeghachi ya ihe dika ọlu-ya nile si di:

15 gi onwe-gi nēche kwa onye ahu nche; n’ihi na o guzogidere okwu-ayi nke-uku.

16 Na ngọpum mbu ọ dighi onye ọ bula nọ n’akukum, kama madu nile rapuru náním: ka aghara igu ya n’isi-ha.

17 Ma Onye-nwe-ayi guzorom nso, we me ka m’di ike; ka ewe were ọnum kwusazue nkwusa ahu, ka ndi mba ọzọ nile we nu kwa: ewe dọputam n’ọnu ọdum.

18 Onye-nwe-ayi gādọputam n’ajọ ọlu nile ọ bula, Ọ gāzọputakwam ka m’bata n’ala-eze-Ya di n’elu-igwe: Onye otuto diri rue mb͕e nile ebighi-ebi. Amen.

19 Kele Priska na Akwila, na èzí-na-ulo Ọnisifọrọs.

20 Erastọs nọgidere na Kọrint: ma arapurum Trọfimọs nime Militọs, aru adighi ya ike.

21 Were inu-ọku-n’obi bia tutu mb͕e oyi erue. Yubulọs nēkele gi, ya na Pudins, na Lainọs, na Klọdia, na umu-nna-ayi nile.

22 Ka Onye-nwe-ayi nọyere mọ nke gi. Ka amara dinyere unu.

Categories
TAITỌS

TAITỌS 1

1 Pọl, orù nke Chineke, na onye-ozi nke Jisus Kraist, dika okwukwe ndi Chineke rọputara si di, ya na nmazu nke ezi-okwu ahu nke di n’uzọ nsọpuru-Chineke,

2 n’olile-anya nke ndu ebighi-ebi, nke Chineke, Onye nāpughi ikwu okwu-ugha, kwere nkwa ya tutu mb͕e ebighi-ebi erue;

3 ma O mere ka okwu-Ya puta ìhè n’oge nke aka Ya nime nkwusa, nke enyere n’aka mu onwem na ntukwasi-obi idebe dika ihe nke Onye-nzọputa-ayi Chineke nyere n’iwu si di;

4 Pọl nka nēdegara Taitọs akwukwọ, bú ezi nwa nkem dika okwukwe ayi kwekọrọ si di: Amara na udo diri gi nke si n’aka Chineke, bú Nna-ayi, na Kraist Jisus Onye-nzọputa-ayi puta.

5 N’ihi nka ka m’rapuru gi na Krit, ka i we dozie ihe fọduru, do kwa madu ndi-okenye n’obodo nile ọ bula, dika mu onwem nyere gi iwu;

6 ọ buru na onye ọ bula bu onye anāpughi ibo ebubo, di nke otù nwunye, nēnwe umu kwere ekwe, bú ndi anēboghi ebubo na ha nādi ndu ila-n’iyì, ndi nābughi kwa ndi nēkweghi inọ n’okpuru iwu.

7 N’ihi na onye ahu nke nēlekọta nzukọ Kraist anya aghaghi ibu onye anāpughi ibo ebubo, dika onye nāchi èzí-na-ulo Chineke; onye nābughi onye nwere isi-ike, nābughi onye nēwe iwe ọsọsọ, nābughi onye nēse okwu site n’iṅubiga manya ókè, nābughi onye nēti madu aka, nābughi onye akpiri urù nēweta ihere nākpọ nku;

8 kama ọ ghaghi ibu onye nēle ndi-ọbìa nke-ọma, onye nāhu ezi ihe n’anya, onye uche-ya zuru okè, onye ezi omume, onye di ọcha n’obi, onye nējidesi onwe-ya ike;

9 nējide okwu ahu nke kwesiri ntukwasi-obi nke di ka ozizí-ayi si di, ka o we pu idusi ọdu ike nime ozizí nke nēnye ezi ndu, na itu kwa ndi nēkwugide ekwugide nmehie-ha n’anya.

10 N’ihi na ọtutu madu di ndi nēkweghi idi n’okpuru iwu, ndi nēkwu okwu efu, ndi nāghọb͕u kwa obi madu, ma nke kachasinu ndi si n’etiti ndi obibì-úgwù puta,

11 ndi anāghaghi imechi ọnu-ha; ha bu madu ndi nēkpù madu dum di n’èzí-na-ulo iru, nēzí ihe nke nēkwesighi ka ha zí, n’ihi urù nēweta ihere.

12 Otù onye n’etiti ha, bú onye-amuma nke aka ha, siri, Ndi Krit bu ndi-ugha mb͕e dum, anu-ọhia jọrọ njọ, ndi afọ-nri nādighi-alu ọlu.

13 Àmà nka bu ezi-okwu. N’ihi ihe a were kwa aka ike tu ha nmehie-ha n’anya, ka ha we nwe ezi ndu nime okwukwe-ayi,

14 ka ha ghara iṅa nti akukọ-irò ihe di iche nke ndi-Ju, na ihe di iche iche nke madu nyere n’iwu, bú ndi nēchighari rapu ezi-okwu ahu.

15 Ihe nile di ọcha n’ebe ndi di ọcha nọ: ma n’ebe ndi emeruworo ndi nēkweghi kwa ekwe nọ ọ dighi ihe ọ bula di ọcha; kama, emeruwo ma uche-ha ma akọ-na-uche-ha.

16 Ha nēkwuputa na ha matara Chineke; ma ọlu nile ha ka ha ji gọnari Ya, ebe ha bu ihe-ùrú, ndi nādighi-ekwenye kwa, buru kwa ndi ajuru aju n’ebe ezi ọlu nile ọ bula di.